Psalms 145

Wimbo Wa Kusifu Ukuu Na Wema Wa Mungu

Wimbo wa Sifa. Wa Daudi.

1 ^aNitakutukuza wewe, Mungu wangu Mfalme,
nitalisifu jina lako milele na milele.
2 ^bKila siku nitakusifu
na kulitukuza jina lako milele na milele.

3 ^c Bwana ni mkuu, anayestahili kusifiwa sana,
ukuu wake haupimiki.
4 ^dKizazi kimoja kitasifia kazi zako kwa kizazi kingine,
watasimulia matendo yako makuu.
5 ^eWatasema juu ya utukufu wa fahari ya ukuu wako,
nami nitatafakari juu ya kazi zako za ajabu.
6 ^fWatasimulia uwezo wa kazi zako za kutisha,
nami nitatangaza matendo yako makuu.
7 ^gWataadhimisha wema wako mwingi,
na wataimba kwa shangwe juu ya haki yako.

8 ^h Bwana ni mwenye neema na mwingi wa huruma,
si mwepesi wa hasira, bali ni mwingi wa upendo.
9 ⁱ Bwana ni mwema kwa wote,
ana huruma kwa vyote alivyovifanya.
10 ^jEe Bwana, vyote ulivyovifanya vitakusifu,
watakatifu wako watakutukuza.
11Watasimulia utukufu wa ufalme wako
na kusema juu ya ukuu wako,
12 ^kili watu wote wajue matendo yako makuu
na utukufu wa fahari ya ufalme wako.
13 ^lUfalme wako ni ufalme wa milele,
mamlaka yako hudumu vizazi vyote.

Bwana ni mwaminifu kwa ahadi zake zote
na mwenye upendo kwa vyote alivyovifanya.
14 ^m Bwana huwategemeza wote waangukao,
na huwainua wote waliolemewa na mizigo yao.
15 ⁿMacho yao wote yanakutazama wewe,
nawe huwapa chakula chao wakati wake.
16 ^oWaufumbua mkono wako,
watosheleza haja ya kila kitu kilicho hai.

17 ^p Bwana ni mwenye haki katika njia zake zote,
na mwenye upendo kwa vyote alivyovifanya.
18 ^q Bwana yu karibu na wote wamwitao,
karibu na wote wamwitao kwa uaminifu.
19 ^rHuwatimizia wamchao matakwa yao,
husikia kilio chao na kuwaokoa.
20 ^s Bwana huwalinda wote wampendao,
bali waovu wote atawaangamiza.

21 ^tKinywa changu kitazinena sifa za Bwana.
Kila kiumbe na kilisifu jina lake takatifu
milele na milele.